मेरो खोटांग मेरो प्राण एकता हो हाम्रो शान ।

खोटांङ समचारहरु दमन-राई

खोटाङको पाथेका र दुवेकोलमा आगलागी/करिब १२ लाख बराबरको धनमाल नष्ट

चैत्र-६, खोटाङको पाथेका र दुवेकोलमा आगलागी हुँदा करिब १२ लाख बराबरको धनमाल जलेर नष्ट भएको छ । भान्छा कोठाबाट सल्किएको आगोले पाथेका-६ का चन्द्रबहादुर राईको घर जल्दा १० लाख बराबरको क्षती भएको हो । गए राती भएको आगलागीमा जस्तापाता हालेको तीन तले घर र घरमा भएका अन्नपात, भाँडाकुडा, सात तोला चाँदी लत्ताकपडा जलेर नष्ट भएको खार्ताम्छा बालबेशीका जितन साम्पाङले जानकारी दिनु भयो । घर जलेपछि राईको परिवार छिमेकीको आश्रयमा बसिरहेका छन् ।
यस्तै, दुवेकोल-८ का भक्तबहादुर विश्वकर्माको घरमा आगलागी हुँदा करिब २ लाख बराबरको धनमाल नष्ट भएको छ । विश्वकर्माको फुसले छाएको दुई तले घरमा आगलागी हुँदा घरमा रहेको अन्नपात, लत्ताकपडा, भाडाँकुडा तथा काठपात जलेर नष्ट भएको प्रहरीले जनाएको छ । घर आगलागी भएपछि ६ जनाको विश्वकर्मा परिवार बिस्थापित भएका छन्      ।।

महिलाहरुद्धारा मादक पदार्थबिरुद्धको अभियानमा 

चैत्र-६, मादक पदार्थ सेवन गरेका श्रीमानले शारिरीक र मानसिकरुपमा दुःख दिन थालेपछि खोटाङ सदरमुकाम दिक्तेलका महिलाहरुले मादक पदार्थबिरुद्धको अभियान थालेका छन् । जाँडरक्सीलगायतका मादक पदार्थ पिएर आएका श्रीमानले गाउँमा हो-हल्ला तथा झगडा गर्दै श्रीमतीलाई कुटपिट गर्नेक्रम बढेपछि दिक्तेल-३ र ४ का महिलाहरुले मादक पदार्थबिरुद्धको अभियान थालेका हुन् । आमा समुहले आज नाराजुलुस सहित गाउँ परिक्रमा गर्दै मदिराजन्य पदार्थ बिक्री तथा सेवन नगर्न सचेत गराएको छ । समुहले आफ्नो दिक्तेल-३ र ४ को उत्तरमा उजेली खोला, दक्षिणमा बसैखा खोला, पुर्वमा हस्पिटलदेखि अल्छेढुंगा तथा पश्चिममा मेवाखोला सम्मको क्षेत्रलाई मदिरा निषेधित क्षेत्र घोषणा गरेका छन् ।

अभियानको शुरुमै आज उनीहरुले गाउँका मादक पदार्थ सेवन गर्ने तीन जनालाई आउँदा दिनमा मादक पदार्थ सेवन नगर्ने शर्तमा हस्ताक्षर गराएका छन् । मादकपदार्थ नियन्त्रणकालागि घरदैलो अभियान थालेका आमा समुहले आजै जिल्ला प्रशासन, जिल्ला प्रहरी तथा कोलेनीका कार्यालयसँग आफ्नो अभियानमा सहयोग गर्न अनुरोध गरेको छ । समुहले ज्ञापनपत्र बुझाउँदै मादक पदार्थ बिरुद्धको अभियानमा सहयोग गर्न आग्रह गरेको हो । महिलाहरुको अभियानलाई सहयोग गर्ने प्रमुख जिल्ला अधिकारी केशबराज आचार्यले आश्वासन दिनु भएको छ ।
समुहले मादक पदार्थ सेवन गर्ने व्यक्तीलाई पहिलो पटक भए समाजको अगाडि सार्वजनिक गर्ने, दोश्रो पटक भए पाँच सय जरिवाना सहित सञ्चार माध्यमबाट नाम, ठेगाना र तस्बिर प्रकाशन तथा प्रशारण गर्ने र तेश्रो पटक भए कानूनी कारबाहीकालागि प्रकृया अघि बढाउने आमा समुहकी अध्यक्ष सरस्वति आचार्यले बताउनु भयो ।

                                          ।।

आमा समुहले मातेर हिँड्नेको परिचय प्रकाशन तथा प्रशारण गर्ने

चैत्र-४, खोटाङ सदरमुकाम दिक्तेलका महिलाहरुले मादक पदार्थ सेवन गरेर हो-हल्ला गर्दै हिँड्ने व्यक्तीको नाम, ठेगाना र तस्बिर स्थानीय सञ्चार माध्यमबाट प्रकाशन तथा प्रशारण गर्ने भएको छ । मादक पदार्थले मानवीय सम्पत्ती र स्वास्थ्यमा परिरहेको प्रतिकूल अशर कम गर्नकालागि दिक्तेल-३ र ४ का आमाहरुले मातेर हिँड्ने व्याक्तीलाई नगद पाँच सय जरिवाना सहित नाम, ठेगाना र तस्बिर स्थानीय सञ्चारमाध्यमबाट प्रकाशन तथा प्रशारण गर्ने भएको हो ।

मातेर हिँड्नेलाई हतोत्सहित गर्दै मादक पदार्थरहित समाज स्थापनाकालागि महिलाहरुले सामुहिकरुपमा मादक पदार्थबिरुद्धको अभियान थालिएको आमा समुहकी अध्यक्ष सरस्वति आचार्यले बताउनु भयो । आमा समुहले मादक पदार्थ सेवन गरेर जथाभावी गर्नेलाई समाजको अगाडि सार्वजनिक गर्ने, नभए कानूनी कारबाहीकालागि प्रकृया अघि बढाउने आमा समुहले जनाएको छ ।

                                          ।।